Ракометарите на Шведска, кои се сметаат за еден од фаворитите за освојување медал на Олимписките игри во Токио, со судни маки ја минаа првата пречка наречена Бахреин (32-31), во драматичен меч во кој противникот имаше шанса да изедначи буквално во последните секунди.
Херој во скандинавската селекција беше голманот Андреас Паличка, кој со звукот на сирената одбрани пенал и не дозволи неговата селекција да остане без еден планиран бод. Бахреинците долго ќе жалат за пропуштената шанса против фаворизираниот ривал, со оглед што водеа во поголемиот дел од средбата, а имаа и 31-30 пред самиот крај. Но, искуството на Швеѓаните дојде до израз за прв триумф во групата Б.
Претходно утринава на ракометниот турнир, Норвешка го совлада Бразил (27-24), а Франција немаше мака против Аргентина (33-27). До крајот на денот силите ќе ги одмерат Германија и Шпанија, Португалија и Египет односно Данска и Јапонија.