Теодора Дукоска (16 години) е уште една млада талентирана ракометарка која доаѓа од екипата на ЖРК Стружанка од градот Струга, расадник на ракометни репрезентативци и репрезентативки. Игра на позицијата десно крило и десен бек зависно од потребата на тимот. Теодора има неколку настапи за кадетската репрезентација на Македонија, а на последните собири како и за баражот со Романија селекторот на сениорската репрезентација г-дин Симе Симовски ја стави на поширокиот список и на сениорките. Дукоскa специјално за порталот www.javisejuzna.mk одговори на неколку прашања:
На колку години започна со ракомет ? Од каде љубовта кон овој спорт?
-Љубовта кон ракометот се јави уште од мали нозе, а започнав да тренирам на 11 годишна возраст во екипата на ЖРК Стружанка во Струга кај тренерот Владимир Паноски. Со оглед на тоа дека потекнувам од спортско семејство, љубовта кон ракометот и желбата да започнам да тренирам ја добив од мојот брат.
На колку години започна да играш во првиот тим на Стружанка ?
– Довербата да заиграм во првиот тим на ЖРК Стружанка од тренерот ја добив уште на мои 14 години.
Колку настапи имаш за кадетската и младинската репрезентација на Македонија ?
-Во составот на кадетската репрезентација на Македонија имам учествувано два пати, и еднаш во составот на сениорската репрезентација. А поради ситуацијава со ковид-19 не беа одржани собирите на младите репрезентации.
Селекторот Симе Симовски ве одбра и во поширокиот список на репрезентативки за сениорскиот тим . Дали сте среќна поради тоа ?
– Многу сум благодарна за пружената доверба од страна на селекторот, тоа ми дава дополнителна мотивација за понатамошно напредување и поголеми достигнувања.
Каде се гледаш во иднина и кој е твој идол ?
– Пред се сакам гордо да ги бранам боите на Македонија, и професионално да се занимавам со овој спорт. Мој идол е Ана Вахирева десниот бек на Русија и на Ростов Дон. Се надевам дека еден ден ќе успеам да ги направам горди сите стружани и сите македонци со моите успеси.
Што ќе им порачаш на нашите читатели ?
– На читатели на порталот www.javisejuzna.mk сакам да им порачам да се чуваат и што поскоро да се вратат на спортските трибини, за заедно да уживаме во спортот и убавините кои тој ги нуди.
