За првпат после точно една година, фановите на Детроит Лионс го почувствуваа вкусот на победата, откако нивните миленици, во тринаесеттото коло, ги поразија Минесота Викингс со 29-27.
Иако губеа со 0-6 после првата четвртина, во вториот квартал, ,,Лавовите” ја направија клучната серија од 20-0, која им ја донесе првата победа во тековната сезона.
За Детроит, квотербекот Џеред Гоф уфрли 296 јарди од 25/41 прецизни додавања од кои, три завршија со тачдаун.
За победничкиот состав, освен шутерот Рајли Патерсон (11 поени), поентери беа уште Брок Рајт, Ти Џеј Хокенсон и Амон-Ра Ст. Браун.
Токму последниот играч ја доживеа славата на истоимениот египетски бог, откако им ја донесе победата на Лионс со тачдаунот во последната секунда од мечот.
За Викингс, квотербекот Кирк Казинс одигра фантастичен натпревар со 340 освоени јарди од 30/40 обиди за додавање и со два уфрлени тачдауни, но неговиот тим изгуби огромни шанси за победа поради трите нереализирсни конверзии за два поени.
Од редовите на клубот од Минеаполис, шутерот Грег Џозеф погоди 3/3 филд-голови, а по еден тачдаун постигнаа Александер Метисон, Џастин Џеферсон и Кеј Џеј Осборн.
Во НФК, Детроит (1-10-1) остана на самото дно, додека Минесота (5-7) падна на деветтата позиција.
Во соработка со НФЛ Македонија
