По вторпат во низа во меѓусебните дуели на ,,Артемио Франки”, екипите на Фиорентина и на Сасуоло ги поделија бодовите.
Имено, во осумнаесеттото коло од тековната сезона на италијанската Серија А, двата ривали ремизираа со 2-2 во Фиренца.
Во првото полувреме, Сасуоло беше комплетно инфериорен состав, но сепак замина на пауза со предност од 0-2.
За ,,Зелено-црните”, четвртиот гол на последните шест средби го постигна Џанлука Скамака (32′), а само пет минути подоцна, водството го удвои Давиде Фратези (37′).
Фиорентина, во воведниот дел на второто полувреме, го намали својот заостаток на 1-2, со шеснаесеттиот овосезонски погодок на Душан Влаховиќ (51′).
За Србинот, овој гол беше вкупно триесет и трет во календарската 2021 година што е еднаков учинок како и рекордот на Кристијано Роналдо од минатата година во Серија А.
После еден час игра, ,,Виолетовите” го анулираа својот дефицит, откако конечниот резултат го постави Лукас Тореира (61′).
До крајот, наместо за пресврт, домаќините се бореа за реми со оглед на фактот дека останаа со играч помалку после вториот жолт картон на Кристијано Бираги (68′).
На табелата, Фиорентина го зазема шестото место, додека Сасуоло се наоѓа на десеттата позиција.
