Синсинати Бенгалс направија голем чекор кон освојување на АФК Север, откако во шеснаесеттото коло ги совладаа Балтимор Рејвенс со 41-21.
Рејвенс влегоа во овој дуел со многу отсутни клучни играчи и запишаа двоен дивизиски пораз од Бенгалс за првпат после сезоната 2015/16.
Од редовите на победничкиот состав блескаа сите играчи, а особено квотербекот Џоу Бароу, кој уфрли 525 јарди од 37/46 обиди и 4 тачдауни за конечен рејтинг од 143,2 поени.
Од неговите соиграчи, по два тачдауни постигнаа Џоу Миксон (135 јарди) и Ти Хигинс (194 јарди), еднаш поентираше Тајлер Бојд (85 јарди), а уште 125 јарди претрча Џа’Мар Чејс.
Кај Балтимор, на квотербековската позиција настапи Џош Џонсон, кој со 28/40 комплетирања префрли 304 јарди, 2 тачдауни и 1 пресечен пас.
Од гостинскиот состав, топката во противничката енд-зона ја внесоа Девонта Фримен, Марк Ендрус (125 јарди) и Рашод Бејтмен.
Со вториот триумф во низа, Синсинати (9-6) го презеде првото место во дивизијата, односно шестото во Американската конференција, додека Балтимор (8-7) падна на осмата позиција.
*Во соработка со НФЛ Македонија*
