Во првиот меѓусебен дуел после 2017, односно втор после легендарниот Супер Боул 51, Њу Ингланд Патриотс ги декласираа Атланта Фалконс со 0-25.
,,Патриотите” дојдоа до петтата победа во низа на ,,крилјата” на својата одбрана, која не дозволи поени по тринаесетти пат од 2000 наваму што претставува израмнување на рекорд на Балтимор Рејвенс.
Од дефанзивците, Девин МекКурти, Адријан Филипс и Џеј Си Џексон пресекоа по едно додавање, а најдобри перформанси, со два сека и со еден пик-6, имаше Кајл Ван Ној.
Освен Ван Ној, тачдаун за Патриотс постигна и Нелсон Аголор,а шутерот Ник Фолк погоди четири филд-голови и еден екстра-поен.
На квотербековската позиција на Њу Ингланд настапи Мек Џонс, кој уфрли 207 јарди од 22/26 прецизни додавања.
Кај Атланта, истата улога ја одиграа тројца играчи, но ниеден од нив не успеа да се прослави.
Мет Рајан имаше две пресечени додавања и само 153 освоени јарди, Џош Роузен имаше учинок од 1/3 прецизни обиди кон своите, но и кон противничките играчи, а Фелипе Френкс доби пресечен пас на своето деби, односно со единственото негово фрлање во НФЛ.
Со новата победа, Њу Ингланд (7-4) скокна на четвртото место во АФК, додека Фалконс (4-6) паднаа на единаесеттата позиција во НФК.
Во соработка со НФЛ Македонија
