Детроит Лионс го приредија најголемото изненадување во тековната НФЛ сезона, откако во петнаесеттото коло ги совладаа Аризона Кардиналс со 30-12.
На полувремето, ,,Лавовите” водеа со 17-0, а во вториот дел, наизменично постигнуваа поени со противникот за да дојдат до конечниот резултат.
Освен шутерот Рајли Патерсон, поентери за Детроит беа Амон-Ра Ст. Браун, Џош Рејнолдс и Џејсон Кабинда, кои постигнаа по еден тачдаун.
Квотербекот на победничкиот состав, Џеред Гоф, уфрли хет-трик, заедно со 216 јарди од 21/26 комплетирања, додека најдобриот тркач, Крег Рејнолдс, претрча 112 јарди.
На спротивната страна, Мет Прејтер погоди два филд-голови, а единственото положување беше дело на Кристијан Кирк.
На квотербековската позиција настапија стартерот Кајлер Мареј (257 јарди од 23/41 обиди; 1 тачдаун и 1 пресечен пас) и резервистот Колт МекКој (56 јарди од 6/9 обиди), кои не успеаја да пенетрираат низ дефанзивата на домаќините.
Во НФК, Аризона (10-4) падна на четвртото место, додека Детроит (2-11-1) сè уште го држи самото дно.
Во соработка со НФЛ Македонија
