На последните три меѓусебни пресметки, по една во 2016, во 2017 и во 2019, Мајами Долфинс постигнаа вкупно 16, а примија неверојатни 137 поени од Балтимор Рејвенс.
Сепак, ,,Делфините”, во увертирата на десеттото коло, приредија сензација и славеа со 22-10 што претставува прва меѓусебна победа после 2015.
Заклучно со третата четвртина, Мајами водеше со минимални 6-3, стекнати со филд-головите на Џејсон Сандерс (х2), односно на Џастин Такер.
Во четвртиот квартал, Сандерс шутираше прецизно уште двапати (еден филд-гол и еден екстра-поен), а неговите соиграчи постигнаа два тачдауни.
Најпрво, дефанзивецот Ксавиен Хауард сам избори, поклопи и претвори за тачдаун еден фамбл, а во финишот, квотербекот Туа Таговаилоа се проби со топката во противничката енд-зона.
Таговаилоа влезе на теренот во почетокот на третата четвртина, наместо повредениот Џакоби Брисет и го заврши мечот со 8/13 прецизни додавања за 158 јарди.
На спротивната страна, Ламар Џексон уфрли 238 јарди од 26/43 обиди, а помеѓу двата тачдауни на Долфинс во четвртиот период, донесе шест поени со пасот кон Марк Ендрус.
Со натпревар повеќе во однос на конкурентите, Балтимор (6-3) остана на второто, а Мајами (3-7) се проби на тринаесеттото место во Американската конференција.
Во соработка со НФЛ Македонија
