На почетокот на декември, Аризона Кардиналс беа најдобар тим во Националната конференција, а воедно и во НФЛ.
Сепак, нивниот учинок драстично се намали, откако синоќа го запишаа петтиот овосезонски пораз, односно третиот во низа.
Имено, на домашен терен, Кардиналс, на божиќната ноќ, беа поразени со 16-22 од Индијанаполис Колтс.
Трагичар за домаќините беше шутерот Мет Прејтер, кој, иако донесе вкупно четири поени, имаше три промашени удари.
Квотербекот на Кардиналс, Кајлер Мареј, уфрли 245 јарди од 27/43 комплетирања и еден тачдаун, а притоа беше и најдобар тркач од својот тим со 74 јарди.
Двете полагања за составот од Аризона беа дело на Чејс Едмондс во првата и на Ентоан Весли во третата четвртина.
На спротивната страна, Ти Вај Хилтон и Дезмон Петмон по еднаш ја внесоа топката во противничката енд-зона, шутерот Мајкл Беџли додаде уште осум поени, а едно сејфти изнудија и гостинските дефанзивци.
Квотербекот на Колтс, Карсон Вентц, уфрли два тачдауни и уште 225 јарди од 18/28 обиди за додавање.
Во НФК, Аризона (10-5) падна на петтата позиција, додека Индијанаполис (9-6) скокна на четвртото место во Американската конференција.
Во соработка со НФЛ Македонија
