Канзас Сити Чифс се новите шампиони на НФЛ, откако во Супер Боул 57 триумфираа над Филаделфија Иглс со 38-35 со филд-гол во последните секунди.
На мечот, поените паѓаа по наизменичен редослед, иако Иглс имаа позитива од 24-14 после втората четвртина.
На овој начин, Филаделфија стана само вториот тим во историјата после Атланта Фалконс во 2017, кој на полувремето на Супер Боул имал двоцифрена предност, а накрај го загубил натпреварот.
Од друга страна, квотербекот на Чифс, Патрик Махоумс, освои МВП награда пред два дена и влезе во елитно друштво со Том Брејди и со Џоу Монтана како единствени играчи со два прстени и со две МВП признанија.
Махоумс го заврши финалето со 182 јарди од 21/27 прецизни додавања и со три тачдауни.
Од неговите соиграчи, шутерот Харисон Баткер беше ,,виновник” за последното славје, а топката во противничката енд-зона ја внесоа Тревис Келси, Ник Болтон, Кадариус Тони и Скај Мур.
На спротивната страна, освен шутерот Џејк Елиот, во листата на поентерите, со фаќање, влезе и Еј Џеј Браун.
Освен нив, одлична партија одигра и квотербекот Џејлен Хуртс, кој постигна хет-трик од тачдауни со трчање, а притоа уфрли и 304 јарди од 27/38 обиди.
На патот до титулата, Чифс ги елиминираа Џексонвил Џагуарс (27-20) и Синсинати Бенгалс (23-20), додека Филаделфија беше подобра од Њујорк Џајантс (38-7) и од Сан Франциско 49ерс (31-7).
Овој пат, задолжена за спектакуларното шоу на полувремето беше познатата мега-ѕвезда – Ријана.
