Вовед:
Ситуацијата во ирската Дивизија 1, односно втората лига, во пресрет на последното коло беше повозбудлива од кога и да е. Имено, за промоција и за плејоф се бореа дури седум од вкупните десет екипи.
Ситуацијата на последнопласираниот Вексфорд беше позната уште од пред три кола, додека резервниот тим на актуелниот шампион, Шамрок Роверс 2 и Атлоун се бореа за чесното осмо место.
Што се однесува до промоцијата, само шампионот изборува директен пласман во првата лига, додека тимовите од второто до петтото место играат во меѓусебен плејоф, а победникот се соочува со претпоследниот прволигашки тим.
Дрогеда Јунајтед беше на првото место со бод предност во однос на второпласираните Бреј Вондерерс, додека во плејоф-зоната се наоѓаа уште УК Даблин, Лонгфорд и Кабинтили, наброени по бодовен редослед. Освен овие пет екипи, два бода заостаток и надеж за плејоф имаа уште Голвеј Јунајтед и Коб Рамблерс.
Од првата лига, релегиран ќе биде шампионот од 2017, Корк Сити, а во плејаут, со победникот на второлигашкиот плејоф, по вторпат во низа ќе учествува тимот на Фин Харпс.
Резултати од последното коло:
Атлоун 0-1 Бреј Вондерерс
Кабинтили 0-2 Дрoгеда Јунајтед
Коб Рамблерс 0-0 Шамрок Роверс 2
Голвеј 2-2 УК Даблин
Вексфорд 2-1 Лонгфорд
Епилог:
Ситуацијата на табелата остана речиси непроменета, иако имаше доста потенцијал за да се случат неочекувани промени. За Дрогеда, сè тргна како „подмачкано“, кога во завршницата на првото полувреме, Кабинтили остана со играч помалку по вториот жолт картон на младиот дефанзивец Џонатан Карлин. Во продолжение, клубот што е збратимен со турски Трабзонспор поради истите бои и обележја, избори промоција во највисокиот фудбалски ранк во Ирска за првпат после 2017.
Во борбата за плејоф, Лонгфорд неочекувано загуби од Вексфорд, кој ја оствари својата втора победа во цела сезона, а тоа му пружи шанса на Голвеј за „крадење“ на шестото место. Сепак, момците од регионот Конахт, иако водеа со 1-0 против УК Даблин и иако имаа шанси за победа во завршницата, останаа без зацртаната цел, ремизирајќи со 2-2.
Во полуфиналето на плејофот, силите ќе ги одмерат Бреј Вондерерс и Кабинтили, односно УК Даблин и Лонгфорд.
https://www.instagram.com/p/CG3KpLPKDFv/?igshid=8t4z68oy0w0j



