После шест години, екипата на ,,Ред Бул” се радуваше на 1-2 победа, откако на трката за големата награда на Емилија Ромања ги освои првите две позиции.
Имено, во соло-трка, Макс Ферстапен дојде до вториот овосезонски триумф, додека втората позиција ја освои неговиот клупски колега – Серхио Перез.
Откако на почетокот се откажа Карлос Саинц, лошиот ден на ,,Ферари” го комплетираше Шарл Леклер, кој загуби подиум, така што се изврте во завршната фаза и заврши како шести.
Најниското место на пиедесталот, после среќните околности, му припадна на младиот Британец на ,,Мекларен” – Ландо Норис.
На четвртата и на петтата позиција завршија Џорџ Расел и Валтери Ботас, а во првите десетмина се најдоа уште Јуки Тсунода, Себастијан Фетел, Кевин Магнусен и Ленс Строл.
Шампионот од 2020, Луис Хамилтон, остана без бодови, заземајќи ја четиринаесеттата позиција.
