Англискиот второлигаш Хал Сити официјално беше откупен од страна на турските операторски гиганти, Аџун Медиа, после контроверзното владеење на фамилијата Алам од единаесет години.
Станува збор за турска компанија, на чело со Аџун Илиџали, која ги поседува турските телевизиски канали ТВ8 и ТВ8,5, кои се пренесуваат низ Европа, низ Јужна и низ Северна Америка.
Под Аџун Медиа, исто така, спаѓа и дигиталната платформа Ексен, како и турското спортско шоу – Ексатлон.
Контроверзноста со фамилијата Алам кулминираше во 2013, кога сопственикот Асем Алам одлучи да го промени името на тимот, односно да додаде суфикс (Хал Сити) Тигерс, преземајќи го моделот од американските екипи.
Сепак, навивачите на Хал Сити направија огромен протест и го задржаа своето старо име, но останаа во нестабилен период, откако клубот патуваше низ првите три лиги од сезона во сезона.
,,Среќни и горди сме што го напуштаме Хал Сити со силна и стабилна финансиска состојба. Додека ние бевме сопственици, работевме напорно за да основаме одржлив модел и успешна академија, кои ќе му ги дадат на клубот потребните услови во иднина. Способноста да создадеш и да продадеш домашен играч е клуч за одржливоста на еден клуб и ние одвај чекаме да видиме повеќе и повеќе играчи, кои ќе ги следат овие патеки во Хал Сити.” – се огласи поранешниот потпретседател на Хал Сити – Ехаб Алам.
Иако ,,Тигрите” имаа нестабилни сезони, сепак фамилијата Алам ги постави темелите на добрата академија од која произлегоа повеќе фудбалски таленти – Том Керни, Лиам Купер, Даниел Џејмс, Кин Луис-Потер, Џерод Боувен…
,,Среќен сум што го исполнив еден од моите најголеми сонови. Започнуваме прекрасно патување со Хал Сити. Имаме големи соништа и големи цели, кои сакаме да ги исполниме со нашите навивачи. Сакам да му се заблагодарам на семејството Алам за пријателството и за искреноста што ја покажаа за време на овој процес. Навистина верувам дека ќе стигнеме до успех со прекрасните фанови на овој прекрасен град.” – гласеа зборовите на новиот сопственик – Аџун Илиџали.
Според неофицијални извори, откупувањето на Хал Сити од страна на турскиот бизнисмен било извршено за триесет милиони фунти.