По вторпат во низа, Канзас Сити Чифс се пласираа во Супер Боул, откако синоќа, во финалето на АФК, ги надиграа Бафало Билс со 38-24.
Чифс покажаа значително подобри перформанси во секој сегмент на играта, иако првично губеа со 0-9.
Билс постигнаа по еден тачдаун и по еден филд-гол во првата и во четвртата четвртина, односно само по еден шут за три поени во втората и во третата. За шутевите беше задолжен Тајлер Бас, додека поентери преку тачдаун беа Досон Нокс и Ајзеа МекКензи.
Од друга страна, Чифс постигнаа три тачдауни во вториот квартал преку Мекол Хардмен, Дарел Вилијамс и Клајд Едвардс-Хилер, а во третиот и во четвртиот период, Тревис Келси по еднаш ја внесе топката во противничката енд-зона. Освен нив, во листата на поентери се запиша и шутерот Харисон Баткер, со еден филд-гол и со пет екстра-поени.
Квотербекот на Чифс, Патрик Махоумс, одигра маестрална партија со 325 освоени јарди од 29/38 обиди. Неговите топки најчесто одеа кон Тајрик Хил (172 јарди од 9 фаќања) и кон Тревис Келси (118 јарди од 13 фаќања).
На спротивната страна, Џош Ален имаше еден пресечен пас, заедно со 287 освоени јарди со додавање од 28/48 обиди, односно дополнителни 88 јарди поминати со 7 трчања.
Во Супер Боул натпреварот, Канзас Сити Чифс ќе се обидат да ја одбранат титулата против Тампа Беј Баканирс, кои беа подобри од Грин Беј Пекерс со 26-31.
📸 Sportsnet
Во соработка со НФЛ Македонија
