Вицешампионите од сезоната 2018/19, во последниот меч од единаесеттото коло во НФЛ, им гостуваа на Баканирс од Тампа Беј.
Натпреварот беше полн со атракција, израмнувања и пресврти, но накрај Ремс триумфираа со 24-27.
Во првото полувреме, двете екипи постигнаа по два тачдауни – Роберт Вудс и Ван Џеферсон за Ремс, односно Мајк Еванс и Ленард Фурнет за Баканирс. Единствена причина поради којашто екипата од Лос Анџелес замина со предност на паузата беше погодениот филд-гол на Мет Геј во последната секунда.
Имајќи во предвид дека гостите го добија овој меч, нивната активна серија од победи при водство на полувремето од 2017 се зголеми на 32-0 што е втора најдолга во историјата на НФЛ.
Во вториот дел, повторно идентичен учинок имаа и двата ривали, со по еден тачдаун и по еден филд-гол.
За Баканирс прецизно шутираше Рајан Сакоп, а топката во противничката енд-зона ја внесе Крис Годвин, додека за Ремс поентираа Кем Ејкерс и гореспоменатиот Геј.
На нешто помалку од три минути до крајот, Том Брејди имаше напад, со којшто можеше да го израмни или да го преврти резултатот, но искусниот квотербек ја подаде топката во рацете на противничката одбрана, односно на Џордан Фулер, кој претходно уште еднаш му пресече негово додавање.
За нијанса подобар од Брејди беше гостинскиот квотербек, Џеред Гоф, кој имаше биланс од три тачдауни, две пресечени додавања и освоени 376 јарди од 39/51 успешни обиди.
Со новиот триумф, Ремс (7-3) го презедоа врвот на НФК Запад и се искачија до второто место во својата конференција, додека Баканирс (7-4) се три позиции подолу.
Во соработка со НФЛ Македонија
