Спектакуларната увертира на новата НФЛ сезона го донесе и шестиот триумф на Том Брејди против Далас Каубојс, откако Тампа Беј Баканирс ги добија ривалите од Тексас со 31-29.
На мечот, Каубојс водеа само во втората четвртина со 14-16, пред да стекнат ново водство од 28-29 на минута и пол пред крајот.
Имено, Тампа Беј делуваше доста уверливо сè до последните пет минути, кога Крис Гудвин направи фамбл на неколку јарди од енд-зоната и им ја врачи топката на своите ривали.
Во наредниот драјв, Грег Зурлајн го погоди својот трет филд-гол од петтиот обид на мечот, но во последната секунда, со иста мера возврати и шутерот на Баканирс, Рајан Сакоп, кој ја остави победата во Флорида.
Досега, Том Брејди има учинок од 9/19, кога на неговиот тим му треба најмалку филд-гол во последните три минути, а со денешниот успех, 44-годишниот квотербек дојде до својот петнаесетти триумф во првото коло што е апсолутен рекорд од 1950 наваму.
Брејди го заврши мечот со неверојатни цифри од 379 освоени јарди, од 32/50 обиди за додавање и од четири тачдауни, но на сето тоа додаде и две пресечени топки.
Од неговите соиграчи, Роб Гронковски постигна два тачдауни и освои 80 јарди, а по еднаш, топката во енд-зоната ја внесоа гореспоменатиот Гудвин (1 тачдаун, 105 јарди) и Антонио Браун (1 тачдаун, 127 јарди).
На спротивната страна, Дак Прескот беше за нијанса посигурен со 42/58 обиди за пас, со 403 јарди, со 2 тачдауни и со само едно пресечено додавање.
Од редовите на Каубојс, убедливо најкорисни фудбалери беа Амари Купер (2 тачдауни, 139 јарди) и СиДи Лемб (1 тачдаун, 104 јарди).
