Иако беа речиси ,,отпишани”, Сиетл Сихокс ја завршија регуларната НФЛ сезона со две победи и успеаја да обезбедат пласман во плејофот.
Имено, во последното коло, Сихокс ги добија дивизиските ривали, ЛА Ремс, со 19-16 после продолжение.
На мечот, двете екипи поентираа по наизменичен редослед, а убедливо најзаслужни беа шутерите Џејсон Мајерс за Сихокс и Мет Геј за Ремс.
За актуелните шампиони, единствениот тачдаун го постигна Катариус Атвел, а квотербекот Бејкер Мејфилд освои скромни 147 јарди од 13/26 прецизни додавања.
Неговиот колега на спротивната страна, Џено Смит, иако имаше два пресечени пасови, уфрли 213 јарди од 19/31 обиди и еден тачдаун кон Тајлер Локет.
ЛА Ремс (5-12) ја завршија сезоната на четиринаесеттото место во Националната конференција, додека Сихокс (9-8), како седми, им го ,,украдоа” плејофот на Детроит Лионс и закажаа дуел со Сан Франциско 49ерс.
