Четирикратниот европски првак, Фролунда од Гетеборг, го заврши походот кон петтата круна во полуфиналето од хокеарската Лига на шампиони.
Актуелните прваци беа поразени во двомечот од Регле, кој славеше со 5-3 во првата, односно со 1-3 во втората партија.
Иако Фролунда беше поголем фаворит, сепак не успеа да ги оправда очекувањата на домашен терен и да направи пресврт во реваншот.
Гостите од Ангелхолм одиграа подобро во нападот и стекнаа водство од 0-3 со по еден постигнат погодок во секоја третина.
Стрелци за ,,Зелено-белите” беа Антон Бенгтсон, Денис Еверберг и Лудвиг Ларсон, додека, од домашните редови, почесниот гол го забележа Филип Јохансон на четири минути пред крајот.
Освен голгетерите, херој за првото европско финале на Регле беше и голманот Кристофер Рифалк, кој имаше 39/40 одбранети шутеви (97,5%).
Во второто полуфинале, силите треба да ги одмерат Тапара и Минхен, но нивните два дуели засега се одложени поради КОВИД-19.
