Во текот на изминатите три дена, најдобрите светски пикадисти ги одмерија силите во деветтото издание на популарниот Мастерс.
Турнирот беше одигран во Милтон Кинс, Англија и за првпат, наместо 16, во ждрепката беа вклучени 24 играчи, со тоа што најдобрите 8 влегоа во втората рунда.
Минатогодишниот шампион, Питер Рајт, доживеа елиминација во полуфиналето од Велшанецот Џони Клејтон (11-10).
Токму Клејтон стана новиот Мастерс шампион, откако во финалниот меч го надигра Мервин Кинг со 11-8.
Велшанецот беше одличен со пет фрлања од 180 поени и просек од 104,10 поени по три стрелки.
Клејтон дојде до титулата пред сè поради одличната серија од 5-0, со која, од 3-5, поведе на 9-5.
Исто така, новиот шампион постави рекорд за најголем процент на погодени двојни полиња за освојување на партија, 10/11 (91%), во четврт-финалето против Џејмс Вејд.
За него, ова е прва круна во второто финале на престижните турнири. Првпат, во финале се пласираше на 26 ноември 2017, кога загуби со 11-2 од Микаел Ван Гервен на Плејерс Чемпионшип.
📸 Luke Walker/Getty Images