Иако го започнаа финалето со заостаток од 0-2, Милвоки Бакс, после пет пресметки, водат со 3-2 против Феникс Санс.
Синоќа беше одигран нивниот петти меѓусебен дуел, во кој, за првпат во тековното финале, славеа гостите со 119-123.
Санс супериорно го започнаа мечот и после првата четвртина водеа со за нив максимални +16.
Сепак, во вториот квартал, Бакс направија серија од 21-5 и стигнаа до изедначување, за потоа само да ја држат резултатската позитива во своите раце.
Девин Букер со 40 кошеви беше најефикасен кај Феникс, а од неговите соиграчи, дабл-дабл запишаа Крис Пол (21 поен и 11 асистенции) и Деандре Ејтон (20 поени и 10 скокови).
На спротивната страна, поентерски најрасположени беа Јанис Антетокумбо (32 поени) и Крис Мидлтон (29 поени), додека Џру Холидеј имаше две двоцифрени статистики (27 кошеви и 13 асистенции).
Шестиот и потенцијално последниот дуел од финалната серија е закажан за вечерта помеѓу 20 и 21 јули со почеток од 03.00 часот после полноќ.
