Првиот саботен натпревар од претпоследното коло во тековната НФЛ сезона го одиграа Детроит Лионс и Тампа Беј Баканирс.
Во текот на целиот меч, на теренот ,,постоеше” само еден тим, Тампа Беј, кој накрај триумфираше со убедливи 7-47.
Колапсот на Детроит се случи уште во првата четвртина, кога, поради повреда, стартниот квотербек, Метју Стафорд, го напушти теренот, а наместо него заиграа Чејс Даниел и Дејвид Блаф. Сите тројца освоија вкупно 153 јарди со додавање, проследени со дополнителните 73 јарди освоени од страна на тркачите.
Единствениот тачдаун за Лионс, при резултат од 0-40, го постигна Џамал Ењу по враќање на пант што претставува прв тимски тачдаун од ваков тип после цела година.
За Баканирс, тачдауните ги постигнаа Роб Гронковски (х2), Мајк Еванс (х2), Леонард Фурнет, Крис Годвин и Антонио Браун.
Со двете денешни полагања, Еванс постави нов рекорд во историјата на Баканирс со тринаесет фаќања за тачдаун во една сезона.
На полувремето, Баканирс водеа со 0-34 и освоија вкупно 410 јарди, од кои 348 со додавање. Со сите три категории, денешниот состав на Баканирс испиша клупска историја.
На квотербековската позиција настапи Том Брејди, кој освои 348 јарди со додавање од 22/27 обиди и постигна четири тачдауни. Искусниот играч стигна до бројка од 34 овосезонски тачдауни со додавање што претставува нов рекорд во историјата на Баканирс.
Освен Брејди, во второто полувреме, како квотербек настапи и Блејн Габерт, кој освои 143 јарди со 9/15 обиди и подаде за две полагања.
Со денешната победа, Тампа Беј дојде до учинок од 10-5 и избори пласман во плејофот за првпат после 2007. Од друга страна, надежите за доигрување на Лионс (5-10) пропаднаа уште пред неколку кола.
