37-годишниот руски хокеар, Илја Ковалчук, од денес, официјално стана нов член на Авангард Омск.
Ковалчук потпиша договор на две години со источниот гигант, кој цели кон својата прва титула во КХЛ.
Имено, Русинот е двократен освојувач на втората најквалитетна лига во светот, откако во 2014/15 и во 2016/17 беше еден од клучните играчи на СКА Ст. Петербург.
Во кариерата, Ковалчук помина шест сезони во КХЛ во дресот на СКА, на коишто имаше вкупно 367 настапи и 370 поени (161 гол и 209 асистенции).
На своите почетоци, Ковалчук играше во неколку други руски екипи како: Спартак Москва, АК Барс Казањ и Атлант Митиши.
Во меѓувреме, освен во Русија, икусниот хокеар ја градеше кариерата и во НХЛ, каде што одигра тринаесет сезони за вкупни 966 натпревари и 904 поени (454 голови и 450 асистенции). Во САД, Ковалчук настапуваше за Атланта Трашерс, за Њу Џерси Девилс и за ЛА Кингс, пред да промени уште две средини во текот на минатата сезона – Монтреал Канадиенс и Вашингтон Капиталс.
Освен на клупско, Ковалчук е успешен и на репрезентативно ниво. Со Русија, во 2002 и во 2018 освои бронза, односно злато на ЗОИ во Солт Лејк Сити и во Сочи. На светските првенства, со истата селекција, има две злата, две сребра и три бронзи.
