Една од најпознатите етапни велосипедски трки на француско тло, после Тур д Франс, е дефинитивно Париз – Ница.
Во текот на изминатата недела, беше одржано нејзиното вкупно 79. издание, кое накрај го доби Максимилијан Шахман после неверојатен последен ден.
На првата етапа, Сем Бенет ја продолжи одличната своја серија и триумфираше по третпат во 2021 година, откако претходно освои две етапи на ОАЕ Тур.
На вториот ден, Кеес Бол прв ја помина целната линија, а Бенет, иако беше во водечката група, поради бонификации му го предаде водството во генералниот пласман на Мајкл Метјус.
На третата трка, Штефан Бисегер беше најбрз на хронометарот, задавајќи им заостаток поголем од шест секунди на сите останати натпреварувачи. Аналогно на тоа, Швајцарецот ја презеде зелената маичка од Метјус, кој заостануваше 23 секунди.
Четвртата етапа во целост му припадна на Словенецот Примож Роглич, кој, исто така, убедливо поведе во вкупниот поредок.
На петтиот натпреварувачки ден, Сем Бенет дојде до втората победа во Франција, а еден ден подоцна, истото му појде од рака и на Роглич.
Сепак, Словенецот не застана овде и до крајот ја освои и седмата етапа.
Осмата, а воедно и последната етапа му припадна на Магнус Корт Нилсен. Данецот му зададе заостаток од 3:08 минути на Роглич, кој од првата, падна на петнаесеттата позиција во генералниот пласман.
Од сето ова профитираше Шахман, кој до вчера заостануваше 52 секунди во однос на Роглич, а денес ја одбрани титулата од минатата година.
На второто место во генералниот пласман се пласираше најдобриот млад возач, Александр Власов (+0:19), а трет беше Јон Изагире (+0:23).
Како утешителна награда за Роглич беше зелената маичка за најмногу освоени поени, а како најдобар планински возач заврши Антони Перез.
📸 Bas Czerwinski/Getty Images
