Во последниот меч од деветтото коло, Питсбург Стилерс славеа со 29-27 над Чикаго Берс и го запишаа првиот меѓусебен триумф на домашен терен после 2005 година.
За Стилерс (5-3), ова беше четврта победа во низа, која ги искачи на петтото место во АФК, додека Чикаго (3-6), со серијата од четири порази, падна на четиринаесеттата позиција во НФК.
Мечот се одвиваше во посакуван правец за домаќините, кои заклучно со третата четвртина водеа со 20-6.
Сепак, во последниот дел, Берс, на неполни две минути пред крајот, поведоа со 26-27 и најавија пеколен финиш.
Во последните два напади на мечот, Питсбург го стекна конечното водство со погодениот филд-гол на Крис Босвел, а Чикаго се обиде да возврати на ист начин во последната секунда, но ударот од 65 јарди на Каиро Сантос не беше доволно силен.
Два тачдауни со фаќање за Стилерс постигна Пет Фрајермут, кој притоа освои и 43 јарди, а еднаш со пробивање, топката во енд-зоната ја внесе и Наџи Херис.
Домашниот квотербек, Бен Ротлисбергер, одигра солиден меч со 205 освоени јарди од 21/30 обиди за додавање.
На спротивната страна, Џастин Филдс уфрли 291 јард од 17/29 прецизни фрлања, а притоа имаше еден пресечен пас и дополнителни 45 јарди со трчање.
Од неговите соограчи, во листата на поентерите се запишаа Дарнел Муни (х2) и ДеАндре Хјустон-Карсон како член на специјалниот тим.
Во соработка со НФЛ Македонија
