Канзас Сити Чифс по петти пат во низа изборија конференциско финале на АФК, откако синоќа славеа над Џексонвил Џагуарс со 27-20.
Чифс беа големи фаворити во пресрет на натпреварот и на полувремето имаа предност од 17-7, која успеаја да ја задржат до самиот крај.
Проблем за домашниот состав беше повредата на стартниот квотербек Патрик Махоумс, кој беше заменет од резервистот Чад Хени во втората четвртина, но успеа да се врати на теренот и да го предводи Канзас до триумф.
Махоумс го заврши мечот со 195 јарди од 22/30 додавања и со два тачдауни, а од ,,Црвените”, топката во противничката енд-зона двапати ја внесе Тревис Келси и еднаш Маркез Валдес-Скентлинг.
На спротивната страна, во листата на поентерите влегоа Кристијан Кирк и Тревис Етиен, а квотербекот Тревор Лоренс освои 217 јарди од 21/39 прецизни обиди.
Во финалето на АФК, Канзас Сити Чифс ќе се соочат со победникот од дуелот помеѓу Бафало Билс и Синсинати Бенгалс.
