На четирите досегашни натпревари во 2023, Ковентри запиша едно реми и три порази.
Во рамките на дваесет и осмото коло од Чемпионшип, клубот од Мидлендс беше поразен од Норвич со 2-4.
Натпреварот почна ,,фуриозно” со дури пет голови во првите дваесет и шест минути.
Најпрво, Норвич поведе со автоголот на Мајкл Роуз (6′) и со головите на Онел Хернандез (10′) и на Џош Сарџент (18′), а набргу, Џејми Ален (20′) и Кејси Палмер (26′) го намалија дефицитот на домаќините.
Темпото опадна во второто полувреме, во кое, Киран Дауел (65′) го завери триумфот на ,,Канаринците”.
Со новите три бода, Норвич влезе во плејоф-зоната на шестата позиција, додека Ковентри се наоѓа на петнаесеттото место.
