Најлудиот меч од тековната сезона во англискиот фудбал го одиграа екипите на Рексам и на Довер пред 8572 гледачи на ,,Рејскорс Граунд”.
Имено, во 37. коло од Националната лига, претставниците на Велс славеа над Довер со конечни 6-5.
Во 20. минута, Рексам имаше предност од 2-0, стекната со головите на Пол Малин (6′) и на Џејмс Џонс (20′).
Осум минути подоцна, Довер веќе израмни на 2-2, а до 63. минута, гостите дојдоа до навидум убедливи 2-5.
Стрелци за поразениот тим беа Џорџ Вилкинсон (22′), Алфи Пејви (28′) и Михаел Гјаси (51′, 54′, 63′), кој постигна хет-трик.
Со двата експресни голови на Оли Палмер (65′, 69′), Рексам се врати во игра, а целосниот пресврт го комплетираше во судиското продолжение, благодарение на Џордан Дејвис (90+1′) и на Даниел Џарвис (90+7′).
Довер е единствената екипа од првите шест англиски лиги, која и официјално не успеа да избори опстанок со тоа што го зазема самото дно на табелата.
Од друга страна, ,,машинеријата” на Фил Паркинсон е во полн налет и дојде до високата втора позиција.
