Синоќешната НБА програма ја отвори фантастичниот меч во кој ЛА Клиперс ги поразија Орландо Меџик со 106-104.
Во текот на цел натпревар, резултатот беше изедначен со тоа што ниеден тим не успеа да стекне двоцифрена предност.
Во самиот финиш, Кол Ентони им донесе израмнување на гостите од Флорида, но на 2,2 секунди до крајот, Реџи Џексон го постигна победоносниот погодок за Клиперс.
Со звукот на сирената, Теренс Рос од тешка позиција се обиде да постигне тројка за Орландо, но неговиот шут заврши само во обрачот.
Кај победничкиот состав, најефикасен беше токму Џексон со 25 поени, додека Лук Кенард додаде уште 23.
Од нивните соиграчи фалеа дури тројца носители на играта, односно Никола Батум, Пол Џорџ и Каваи Ленард.
На спротивната страна, токму наведените Ентони и Рос беа најрасположени во нападот со постигнати 23 и 22 кошеви.
Во Западната конференција, Клиперс (15-12) го држат петтото место, додека Орландо (5-22) е претпоследен на Истокот.
