Кениецот Елиуд Кипчоге ја запиша деветтатата победа на светските престижни маратони, откако денес победи во Токио.
Кипчоге помина 42,195 километри за 2:02:40 часа што претставува четврто најбрзо време во историјата.
Две од подобрите времиња ги поседува токму Кипчоге (2:01:39 и 2:02:37), а едно е во сопственост на Кенениса Бекеле (2:01:41).
Кипчоге тргна во Токио со темпо за нов светски рекорд, но во текот на трката истото опадна за нијанса.
Второто место го освои Амос Кипруто (2:03:13), кој трчаше заедно со Кипчоге сè до завршните пет километри, кога почна да го губи чекорот зад победникот.
Подиумот го комплетираше уште еден Африканец, односно Етиопиецот Тамират Тола (2:04:14), а најдобар домашен претставник беше четвртопласираниот Кенго Сузуки (2:05:28).
Кај дамите, првите три места ги окупираа Бриџид Косгеи (2:16:02), Ашете Бекере (2:17:58) и Готитом Гебреселасе (2:18:18).