На првата трка од новата сезона на Мото 3, одржана во Катар, до втората победа во кариерата дојде Андреа Мињо.
За Италијанецот, ова беше воедно прв триумф после 4 јуни 2017, кога славеше на домашен терен во Муџело.
Денес, Мињо ја помина целната линија како прв во неверојатна завршница со само 37 илјадинки предност пред Серхио Гарсија.
Во битката за најниското место на пиедесталот, Јапонецот Каито Тоба го претекна Турчинот Денис Онџу за 21 илјадинка.
На петтото место се пласираше Џон МекФи, а дебитантот, Бразилецот Диого Мореира, беше шестопласиран.
И покрај сите проблеми во текот на трката, Денис Фоџа заврши како седми, а во првите десетмина се најдоа уште Изан Гевара, Рјусеи Јаманака и Чавиер Артигас.
Најголем трагичар беше Ајуму Сасаки, кој водеше убедливо сè до седум кругови пред крајот, но поради оштетување на мотоциклот остана без поени.
