Во 1887, во Хај Викомб, Бакингемшир, бил формиран денешниот Викомб Вондерерс. Точните наоди за причината и начинот на формирање на клубот засега се непознати, но се верува дека суфиксот „Вондерерс“ бил усвоен во чест на првиот освојувач на ФА Купот – Вондерерс ФК. Најпрестижниот трофеј на „сините“ е освојувањето на петтата лига во 1992/93, а најдобар пласман во ФА Купот е полуфиналето од сезоната 2000/01. Освен локалните трофеи, Викомб е еднократен освојувач на ФА Аматер Куп (1930/31) и двократен шампион на ФА Трофи (1990/91 и 1992/93).
Сепак, најголемото достигнување во својата 133-годишна историја, овој клуб го имаше токму пред една седмица кога во финалето на плејофот на Лиг 1 го совлада Оксфорд Јунајтед со резултат од 2-1. За првпат, клубот од Бакингемшир успеа да се пласира во втората лига, а навивачите на најдобар можен начин ја прославија промоцијата.
