Репрезентацијата на Мароко неочекувано, но заслужено го освои првото место во групата Ф, откако во третото коло ја порази Канада со 2-1.
На мечот, брзо водство на Африканците им донесоа Хаким Зијеш (4′) и Јусеф Ел Несири (23′), пред Најеф Агер (40′) да ја затресе својата мрежа.
Во прилог на Мароканците им отиде и ремито од 0-0 на Хрватска и на Белгија, кои пружија одлична партија во Ал Рајан.
Хрватите на ,,стаклени нозе” успеаја да се одбранат од наездата на Белгија и со пет освоени бода да го освојат второто место на табелата.
Од друга страна, несреќните избраници на Роберто Мартинез останаа на третата позиција и се упатија назад кон Европа, жалејќи за неколкуте пропуштени прилики на Ромелу Лукаку.
Во осминафиналето, Хрватска и Мароко ќе ги одмерат силите со двете првопласирани селекции од групата Е, каде што се наоѓаат Шпанија, Јапонија, Костарика и Германија.
