Четириесет и третото Светско првенство во нордиски дисциплини, кое се одржа во Планица (Словенија), заврши со денешната машка трка во крос-кантри на педесет километри.
Истата беше освоена од Паал Голберг, кој ја продолжи норвешката доминација во најдолгата дисциплина во неверојатна завршница.
Норвежанецот (2:01:30,2) го освои првото светско злато во кариерата во индивидуална конкуренција, приредувајќи неверојатен завршен чекор.
Неговиот сонародник, Јоханес Клебо (+1,0), важеше за фаворит во спринтерскиот финиш, но накрај мораше да се задоволи со сребрениот медал.
После осум години, светски медал на педесет километри на Шведска и’ донесе Вилијам Порома (+1,2), оставајќи го зад себе искусниот Кале Халфварсон (+1,6).
Во текот на последниот километар, од главната група отпаднаа Мартин Левстром Нингет (+6,2) и Ииво Нисканен (+9,4), а под една минута доцнеа уште Дидрик Тонсет (+11,6), Јенс Бурман (+42,7) и Тео Шели (+54,3).
