Светското првенство во ски скокови во машка конкуренција заврши денес со тимското натпреварување на големата скокалница (ГС 137) во Оберстдорф.
Најголема радост на домашните гледачи им донесе Германија, односно Пиус Пашке, Зеверин Фројнд, Маркус Ајзенбихлер и Карл Гајгер, кои ја одбранија титулата со новиот златен медал.
Гајгер влезе во елитата со четири освоени медали на едно СП, исто како Мартин Шмит (2001), Томас Моргенштерн (2011), Руне Велта (2015) и Штефан Крафт (2017).
Токму Крафт, кој вчера стана нов светски шампион на голема скокалница, им го донесе на Австријците среброто заедно со Филип Ашенвалд, со Јан Херл и со Даниел Хубер.
Полска беше првопласирана сè до потфрлувањето на Давид Кубацки, кој сепак успеа да избори бронза за својата селекција. Освен него, за Полска скокаа Камил Штох, Пјотр Жила и Андржеј Стекала.
Во продолжение, пласманот во првите пет го комплетираа Јапонија и Словенија.
Најголемо разочарување беше шестопласираната Норвешка, која беше приморана да настапи без новиот шампион на Светскиот куп, Халвор Егнер Гранеруд.
📸 imago images/Sven Simon
