Пред само шест кола, екипата на Карлајл Јунајтед беше загрозена за доживување релегација во петтата англиска лига.
Сепак, со петте победи на последните шест средби, избраниците на Пол Симпсон избегаа на сигурни дванаесет бодови од ,,црвената” зона.
Во триесет и осмото коло од Лиг 2, Карлајл го порази регионалниот ривал, Бероу, со 1-2 во дербито на областа Камбрија.
За ,,Сините”, ова беше вкупно дваесет и петти меѓусебен триумф во локалното ривалство, каде што не знаат за пораз од 9 април 1960.
Стрелци на двата погодоци за победничкиот тим беа Џордан Гибсон (32′) и Кристијан Денис (75′).
Од друга страна, почесен гол за домаќините постигна Оли Бенкс (78′), кој најави неизвесна завршница.
На табелата, Карлајл скокна на седумнаесеттото, додека Бероу го зазема дваесет и првото место.
