Рекордната низа од дваесет и три лигашки натпревари без пораз на Шефилд Венздеј беше запрена во заостанатиот меч од дваесет и деветтото коло на Лиг 1.
Имено, во големото дерби, ,,Утките” беа поразени со 4-2 на ,,Оуквел” од страна на Барнсли.
Барнсли е во огромен налет и не знае за пораз веќе дванаесет средби од кои, дури на десет оствари триумф.
Оваа серија ги искачи ,,Црвените” на четвртото место со само шест бода заостаток во однос на местата што носат директна промоција во Чемпионшип.
Од друга страна, со оглед на фактот дека Плимут го совлада Акрингтон (0-2), Шефилд Венздеј падна на втората позиција, но со два меча помалку од ,,Аџиите”.
После само дванаесет минути, Барнсли веќе водеше со 2-0, благодарение на Деванте Кол (10′) и на Џејмс Норвуд (12′).
Во продолжение, провизорно реми на гостите им донесе Ли Грегори (33′, 74′), но до крајот, мрежата на Камерон Доусон се затресе уште двапати преку Макс Вотерс (83′) и преку Лиам Кичинг (90+6′).
