Првиот саботен меч во тековната НФЛ сезона го одиграа составите на Денвер Бронкос и на Бафало Билс.
За двете екипи, ова е трет меѓусебен дуел од 2014 наваму и секој од нив заврши со победа на Билс, вклучувајќи го и денешниот што заврши со резултат од 19-48.
Фантастичен во победата на Бафало беше квотербекот Џош Ален, кој имаше 28/40 обиди за додавање и вкупно 392 освоени јарди. Згора на тоа, Ален имаше два тачдауни со трчање и два со додавање упатени кон Досон Нокс и кон Џејк Камероу. Освен нив, по еден тачдаун забележија Џери Хјус (дефанзивен тачдаун) и Девин Синглтери. Исто така, 100% успешен беше шутерот Тајлер Бас, кој погоди два филд-голови и шест екстра-поени.
Во редовите на Денвер, сè одеше по негативен пат. Нивниот шутер, дебитант во НФЛ, Тејлор Руселино, погоди само еден од трите шутирани екстра-поени. Останатите поени паднаа преку тачдауните на Мелвин Гордон (х2) и на Ноа Фант.
Со денешната победа, Бафало (11-3) обезбеди плејоф и за првпат после 1995 ја освои својата дивизија, АФК Исток, каде што со години доминираа Њу Ингланд Патриотс. Исто така, за првпат во 21. век, Билс успеаја да изборат над десет победи во две последователни сезони. Од друга страна, Денвер (5-9) ги загуби сите шанси за влез во плејофот.
Во соработка со НФЛ Македонија
