Две екипи со активни серии од нерешени резултати после шеесет минути, Бафало Сабрес и Винипег Џетс, ги одмерија силите во рамките на синоќешната НХЛ програма.
Сабрес и Џетс ремизираа со 2-2 и во меѓусебната пресметка, а гостите од Канада дојдоа до конечен триумф после пенали.
За Винипег, ова беше трет триумф во низа после продолжение/пенали, додека Бафало го запиша шестото реми на последните седум средби.
На мечот, домаќините водеа во два наврати, а гостите успеваа двапати да го анулираат својот заостаток.
Двоен стрелец за Сабрес беше Летонецот Земгус Гиргенсонс, додека за Канаѓаните погодија Блејк Вилер и Мејсон Еплтон.
Во пенал-серијата, Тејџ Томпсон го промаши првиот пенал за Сабрес, а мрежата на Крег Андерсон ја затресоа Пјер-Лук Дубуа, Марк Шајфеле и гореспоменатиот Вилер.
Во Западната конференција, Винипег го зазема десеттото место, додека Бафало е дванаесетти тим на Истокот.
