Четириесет и третото коло од англискиот Чемпионшип беше кобно за Дерби Каунти, кој и официјално доживеа релегација во Лиг 1.
,,Овните”, со овој неуспех, прекинаа низа од четиринаесет второлигашки сезони и отпаднаа во третиот ранг за првпат после 1986.
Момците на Вејн Руни, во пресрет на сезоната, добија забрана за трансфери и за продолжување на договорите на своите играчи, така што веднаш станаа главен фаворит за завршување на дното.
Сепак, ,,Црно-белите” покажаа неверојатна борба на теренот на секој натпревар, поткрепена со бројната поддршка од своите навивачи и до крај ги држеа своите шанси за опстанок.
Најголем ,,удар” за Дерби беше и казната од дваесет и еден поен, која дополнително ја запечати судбината на клубот од Мидлендс.
Доколку на составот од ,,Прајд Парк” не му беа одземени овие бодови, опстанокот ќе беше одамна изборен, заземајќи ја седумнаесеттата позиција.
,,Убиствен” за Дерби беше денешниот пораз од КПР со 1-0, поради голот на Лук Ејмос (88′) во самиот финиш, а против негов прилог одеше и фактот дека Рединг ремизираше против Свонси со 4-4.
Пред неколку дена, на клупската прес-конференција, Руни изјави дека ќе остане на кормилото на Дерби Каунти без разлика дали клубот ќе се натпреваруваа во втората или во третата лига.
