Првиот супервелеслалом од новата сезона на Светскиот куп во алпско скијање во машка конкуренција беше планиран за претходниот викенд во Лејк Луис, Канада.
Сепак, поради неповолни временски услови, истиот беше преместен како увертира на тркачкиот викенд во Бивер Крик, САД.
На него, по вторпат сезонава, победи Марко Одермат (1:08,61), кој остана на првото место и во генералниот поредок.
Втората позиција му припадна на Австриецот Матијас Мајер (+0,78), а најголемата сензација ја приреди скијачот со стартен број 35, односно Бродерик Томпсон (+0,95), кој го освои третото место.
За Канаѓанецот, ова е прв подиум во кариерата и втор пласман во првите десетмина, односно прв после алпската комбинација во Венген на 12 јануари 2018.
Исто така, Томпсон стана прв Канаѓанец со освоен подиум во Светскиот куп после Ерик Геј од 2016 на супервелеслаломот во Вал Гардена.
Победничкиот пиедестал, за само три стотинки му побегна на Германецот Андреас Сандер (+0,98), а петтопласиран беше Винсент Крихмајер (+1,02).
