Последниот натпреварувачки викенд од Светскиот куп во нордиска комбинација во Шонах (Германија) ќе ги одреди освојувачите на големиот и на малите кристални глобуси.
Во пресрет на првата трка на германско тло, односно претпоследна од целата сезона, Јоханес Лампартер го држеше првото место во Светскиот куп пред Јарл Магнус Риибер со 19 поени предност.
Сепак, Риибер (23:48,9) беше убедливо најдобар на денешната трка и со новите сто бода ја презеде жолтата маичка од Австриецот во пресрет на утрешниот одлучувачки настан.
За Норвежанецот, денешната победа беше четириесет и осма во кариерата што претставува израмнување на вечниот рекорд за најмногу победи на Хану Манинен.
Лампартер (+38,1) беше дури шести после првата серија и накрај успеа да се искачи до втората позиција, но го загуби водството во вкупниот поредок за само еден поен.
Денешниот подиум го комплетираше Јорген Граабак (+44,2), кој беше за две десетинки побрз од Винценц Гајгер (+44,4), додека најдобриот скијач, Илка Херола (+47,3) го зазеде петтото место.
