Пред почетокот на минатата сезона, Дерби Каунти се најде во сериозни финансиски проблеми и замина во стечај поради долговите од претходниот сопственик – Мел Морис.
Целата ситуација резултираше со трансфер-ембарго и со казна од 21 поен што беше доволно за ,,Овните” да отпаднат во третата лига после 1986.
Сепак, Дерби ,,скапо ја продаде својата кожа” и се бореше за опстанок во Чемпионшип со сите сили под водство на Вејн Руни, кому ова му беше прв тренерски ангажман.
И покрај релегацијата, Руни изјави дека ќе остане на кормилото на Дерби, но денес неочекувано ја промени својата одлука и реши да замине.
Во неговиот официјален исказ стоеше:
,,Во текот на летото, внимателно ги следев случувањата во врска со сопствеништвото на Дерби Каунти. Денес се сретнав со надлежните за да им ја соопштам мојата одлука дека време е да го напуштам клубот. Тие дадоа сè од себе за да ме предомислат, но јас веќе одлучив.”
,,Мојот престој во Дерби беше како рингишпил на емоции, добри и лоши, но мора да признаам дека уживав во предизвикот. Лично, мислам дека клубот треба да биде предводен од некој со свежа енергија, кој не бил под влијание на случувањата од претходните осумнаесет месеци. Со голема гордост и чест ќе се сеќавам на мојот престој во Дерби и би сакал да им се заблагодарам на стручниот штаб, на играчите и секако на навивачите за нивната неизмерна поддршка.”
,,За крај, знам дека клубот сè уште е мета на некои луѓе, кои сакаат да го преземат неговото раководство. Ним би им кажал дека Дерби Каунти е огромен клуб со богата историја и со одлични навивачи. Му посакувам сè најдобро на клубот и многу успеси во иднина.”
Засега, Дерби е сè уште под стечај и иако нема сопственик, надежта дека ќе се најде вистинската личност е присутна помеѓу верните фанови.