Денес, официјално, своето пензионирање го објави легендарниот фински хокеарски голман – Пека Рине.
Рине има 38 години, а во својата сениорска кариера ги бранеше боите на три сениорски екипи – Карпат, Нешвил Предаторс и Динамо Минск.
Петнаесет години од својот живот, Финецот ги помина во НХЛ, поставувајќи бројни рекорди за франшизата на Предаторс.
Рине е рекордер на тимот од Тенеси по бројот на одиграни средби во регуларната сезона (683), на стартови (667), на победи (369), на шут-аути (60) и на одбрани (17 627).
Исто така, Рине е само еден од вкупно дванаесет голмани во историјата на НХЛ што имаат над 350 победи и над 60 шут-аути.
Што се однесува до плејофот на НХЛ, Финецот има 45 победи од вкупно 89 средби во доигрувањето со просек од 91% на одбранети шутеви.
,,Над петнаесет години бев дел од едно неверојатно патување со Нешвил Предаторс, кое ми го промени животот и ме однесе на повеќе места отколку што можев да замислам… Оваа одлука не беше лесна, но знам дека е вистински избор во вистинско време.”
,,Најавувајќи го моето пензионирање, сакам да им се заблагодарам на моите родители, на моите сестри, на мојата партнерка Ерика, на сите членови на Предаторс (менаџери, стратези, тренери), на моите соиграчи и на моите тренери од младинските категории во Финска.”
,,За крај, им се заблагодарувам на луѓето од Нешвил. Секој од вас придонесе да станам маж, татко и човек каков што сум сега.” – порача Рине.
