Откако ги донесе до најголемиот успех во историјата, односно до титулата во англиската Лиг 2, тренерот Роб Едвардс ненадејно ги напушти Форест Грин Роверс и се пресели во Вотфорд.
Иако беа во потполност разочарани од ваквиот потег, челниците на новиот третолигаш брзо реагираа и доведоа нов стратег.
Имено, на клупата на првиот вегански клуб во светот од наредната сезона ќе биде Иан Бурчнал.
Англичанецот има само 39 години и во својата тренерска кариера ги предводеше Викинг од Норвешка, Остерсундс од Шведска и Нотс Каунти од Англија.
Пред неполна недела, Нотс Каунти доживеа несреќна елиминација во плејофот на Националната лига, губејќи со 1-2 од Гримзби после продолженија, така што Бурчнал уште веднаш се пресели во Глостершир.
Алудирајќи на ,,срамниот” потег на претходниот менаџер Роб Едвардс, сопственикот на Форест Грин, Дејл Винс, изјави:
,,Голема благодарност до Нотс Каунти за начинот на кој се справија со цела ситуација. Покажавме како трансферите во фудбалот сè уште можат да бидат изведени правилно преку стручниот штаб.”
