Најдолгата трка во календарот од Светскиот куп во крос-кантри беше одржана денес во Осло, Норвешка.
Имено, на патеката од 50 километри, во завршниот спринт, најбрз беше Мартин Левстром Нингет (2:03:27,3), кој ја запиша првата победа во својата кариера.
Само шест десетинки зад него заврши неговиот сонародник, Сјур Роте (+0,6), а норвешкиот хет-трик на подиумот го комплетираше Дидрик Тонсет (+3,5).
Еден од најголемите фаворити пред почетокот, Ииво Нисканен (+11,1), заврши на четвртото место, иако беше дел од водечката група цели 48 километри.
Со новите педесет поени, Финецот има изгледни шанси за освојување на генералниот поредок во трките на дистанца со 29 бодови заостаток во однос на Јоханес Клебо на едно натпреварување пред крајот.
На петтото место заврши Вилијам Порома (+11,2), а под една минута доцнеа уште Ендру Масгрејв (+52,7) и Ханс Кристер Холунд (+53,2).
