Во осмото коло на Лиг 1, ситуацијата на табелата доби драстично поразличен изглед.
Линколн му го нанесе вториот последователен пораз на Ипсвич, победувајќи со 1-0, со голот од пенал на Џорџ Грант (77′) и го презеде водството на табелата од Хал.
Од друга страна, Хал загуби од Питерборо со 1-2 и, од првото, падна на второто место на табелата. Питерборо, со новиот триумф, скокна до третото место што резултираше со пад на Ипсвич до четвртата позиција.
На овој меч, Хал поведе преку Малик Вилкс (36′), а во вториот дел, Питерборо ја преврте играта со головите на Џонсон Кларк-Херис (63′) и на Сирики Дембеле (75′).

Останатите две позиции во плејоф-зоната им припаѓаат на Портсмут и на Сандерленд, кои денес го одиграа својот прв меѓусебен дуел сезонава.
Портсмут му го нанесе првиот овосезонски пораз на својот ривал, со резултат од 1-3. Двоен стрелец за ,,Помпи” беше Џон Маркис (25′ и 85′ од пенал), а првиот гол го постигна Маркус Харнс (7′). Единствениот играч на Сандерленд што ја затресе мрежата на Крег МекЏиливреј беше Чарли Вајк (10′).
Кога е во прашање дното на табелата, Бартон и покрај денешното реми од 1-1 против Вимблдон, останува последен, а веднаш пред него, со поен предност, се МК Донс, Оксфорд Јунајтед, Свиндон и Шрузбери.
Резултати од осмото коло:
Џилингем 0-2 Флитвуд
Блекпул 1-0 МК Донс
Бартон 1-1 Вимблдон
Донкастер 1-2 Кру Александра
Хал 1-2 Питерборо
Линколн 1-0 Ипсвич
Нортемптон 0-2 Чарлтон
Шрузбери 1-2 Рочдејл
Сандерленд 1-3 Портсмут
Виган 1-1 Плимут



