Во рамките на 42. коло од англиската Лиг 1 беше одиграно најконтроверзното британско дерби помеѓу Вимблдон и МК Донс.
Од 1889 до 2004, поранешниот Вимблдон ФК беше базиран во Лондон, пред да биде преместан во Милтон Кинс и преименуван во МК Донс.
Лондонските навивачи, во знак на револт, оформија нов клуб, АФК Вимблдон, кој од деветтата се издигна до третата лига.
На денешниот меч, овие два, де факто, исти, но потполно различни тимови, го запишаа третото меѓусебно реми, одигрувајќи со 1-1.
Вимблдон беше за нијанса подобар ривал во првото полувреме што се обелодени со голот за водство на Алекс Вудјард (19′).
Сепак, Донс успеаја да го избегнат третиот пораз во дербито со голот на Трој Перот на десет минути пред крајот.
И покрај освоениот бод, Вимблдон падна на дваесет и второто место и ја продолжи негативната серија без ниеден триумф уште од 7 декември 2021.
Од друга страна, МК Донс избија на втората позиција и се на пат кон директна промоција во Чемпионшип по вторпат, откако ги променија локацијата и името.
