Трката за големата награда на Штаерска беше одржана на истата патека како и претходната трка – „Ред Бул Ринг” во Шпилберг.
По вчерашната освоена пол-позиција, Луис Хамилтон стигна и до својата осумдесет и петта победа во кариерата и вкупно деветнаесетта на којашто бил во водство од стартот па сè до целта. Неговиот тимски колега, Валтери Ботас, во последните кругови успеа да го помине Макс Ферстапен и да заврши на второто место оставајќи го Холанѓанецот на најниското место на подиумот. Александер Албон беше четвртопласиран возач, а најголемата битка ја видовме за позицијата број пет.
Имено, Серхио Перез ја држеше оваа позиција во поголемиот дел од завршницата на трката, но при еден обид за претекнување на Албон, го оштети предниот дел на својот болид. Паралелно со ова случување, Ленс Строл го претекна Даниел Рикијардо за освојување на шестата позиција, но нивната битка најдобро ја искористи Ландо Норис, кој успеа да ги претекне и двајцата. До крајот на последниот круг, Норис успеа да го претекне и Перез и да заврши на петтото место. Перез ќе го изгубеше и шестото место за дел од секундата бидејќи Строл и Рикијардо се доближија екстремно блиску до него.
На последните две позиции што носат поени завршија Карлос Саинц, кој освои дополнителен бод за најбрз круг, како и Данил Квјат.
Двајцата возачи на „Ферари“ го завршија своето учество на оваа трка уште во првите два круга по еден меѓусебен контакт при стартот.
