
Пред три дена, ремек-делото на бендот Некст Тајм, ,,Кога падна на Пирина”, ја имаше својата премиера пред македонската публика.
Самиот спот изобилуваше со прекрасни сцени, својствени за почетокот на дваесеттиот век, во кои, освен актерот Ненад Нацев, главна улога имаше и јастребот Хари.
Хари и’ е добро познат на македонската јавност, пред сè поради гостувањата во бројни телевизиски емисии и присуствата во неколку видео-записи.
Овој јастреб ја стекна својата популарност поради соколарот Трајче Китановски, кој напорно работи со птицата за нејзино усовршување.
Во интервју за ,,Јави се јужна”, Китановски откри две интересни и несекојдневни случки, кои биле дел од снимањето на спотот за ,,Кога падна на Пирина”.

,,Спотот се снимаше на повеќе локации: Битола, Крушево, Куклица, Пониква. Во Пониква, седевме јас и Ненад во кафанчето, се топлевме, јадевме и си ја чекавме сцената. Арно ама, Ненад веќе беше ,,жива вода” од сцената што помина од причина што на Пониква имаше снег, а неговата улога бараше да има повеќе падови во снегот и поради тоа, чорапите му беа мокри. Тој дојде до идеја да ги стави чорапите да се сушат на парното во кафанчето, а парното се наоѓа на самиот влез, така да, кој и да влезе, колку и да не сака, пак ќе ги види (хаха). Потоа дојде неговата нова сцена, тој стана, а јас си останав да чекам на топло. После кратко време, келнерот дојде и ми вика: ,,Дечки, да ве замолам нешто, знам дека чорапите се на некој од вас, гости ни доаѓаат, не е баш пријатно на врата прво што ќе видат чорапи се сушат на парното.”. Јас станав и ги земав, а после имавме и заедничка сцена со Ненад, но чорапите ми останаа во џеб. Кога се заврши снимањето накај 22.00 часот (зашто снимавме цел ден), односно кога стигнав во Скопје, си ги најдов во џеб и му реков: ,,На промоција само ќе ти ги дадам да ми ги потпишеш и толку ти е, мој сувенир ги задржувам (хахаха).“
,,Многу беше интересно кога Хари за првпат се запозна со коњот на Јане. Двајцата се преплашија еден од друг. Хари кога го виде коњот, летна на дрво и оттаму го гледаше, ги ширеше крилјата и викаше со својот препознатлив крик. Коњот штом го слушна тоа, панично почна да трча низ планината и имаше потера четириесеттина минути додека да го најдеме (хаха). Јас и режисерот Огнен Шапковски останавме со Хари, се обидував некое време да го симнам од дрво. Знаев дека е испаничен од коњот и дека кога-тогаш ќе се симне, но Огнен не знаеше и почна да паничи по екипата: ,,Останавме без птица, Трајче го изгуби Хари”. Јас се смеев, а Огнен ми се чудеше од каде таа смиреност и убеденост дека сè ќе биде во ред. На крајот, сепак, сè се заврши во најдобар ред: коњот беше пронајден и Хари се спушти од дрво, но решивме повеќе да не ги здружуваме (хахаха).“
За крај, Китановски додаде и пофални зборови за целата екипа:
,,Сум работел досега на доста проекти, но со ваква забавна екипа, а при тоа професионална, до таа мера да е организирана и испланирана секоја ситница – не.”





