Борбата за превласт помеѓу Шведска и Норвешка во женското крос-кантри продолжи на денешниот скијатлон во рамките на Светското првенство во Планица, Словенија.
На патеката од петнаесет километри, 1-2 победа на шведската репрезентација и’ донесоа Еба Андерсон (38:11,8) и Фрида Карлсон.
Иако можеби имаа поинакви очекувања, Норвежаните накрај се радуваа на бронзата на Астрид Ојре Слинд (+48,0), која на својата 35-годишна возраст го оствари само вториот подиум во сениорската кариера.
Германката Катарина Хених (+53,3) се пласираше на четвртата позиција, а по неа следуваше финското дуо, составено од Керту Нисканен (+56,3) и од Криста Пармакоски (+1:22,1).
На оваа трка, своја претставничка имаше и Македонија во името на Ана Цветановска, која го освои педесет и третото место.
